Anpil moun fè erè (sa se konpreyansyon pa-m apati de eksperyans mwen ak tèt mwen e ak lot moun), yo mete siksè a on sèl kote: o somè...
Mwen aprann ke siksè a se dabō le fèt ke w gen on visyon reyalis e ou deside ame'w ak kouraj ak detèminasyon pou-w pran chemen travay, goumen pou'w leve si'w bite, lonje men bay lōt kap fè efō tou, pandan wap apresye ofi e a mezi chak nouvel etap...
On egzanp senp: ou sètènman ap travay di pou'w amelyore talan'w, kontinye konpoze, espere on jou wap koni, mizik ou ap mache e ap pèmèt ou viv desamman e menm trè byen.
Oubyen ou nan tout reyinyon kote yap pale de pozitivite, de kreyasyon richès, de depasman de swa...
Oubyen ankô wap travay di, envesti, pa domi, monte desann agoch adwat ap chache opotinite, nouvo kontra, kontak...
Eske w pase tout tan'w devan pyano-w selman, sou gita 'w, sou fèy patisyon'w, sou ekipman, sou ban lekol, dèyè on biwo, dèyè on laye, on kontwa, on ōdinatè, etc? Si wi, ou sou wout pou'w reyalize kèk rèv : ou ka jwenn tout mwayen sibzistans, byenèt, ezans. Men eske satisfaksyon saa ap dire!
Pandan wap travay di a, sou konbyen lōt moun ou pran tan fè enpak, konbyen men ou ralé monte pou'w pa fè wout la pou kō-w? Malgré w'ka jwenn desepsyon nan men yo, ou pa dekouraje, ou kontinye pran sou tan'w, sou enèji 'w, sou mwayen'w, pou'w asire'w ke omwens youn lōt pran bon chemen tou...
Se chak ti siksè sa yo ki kenbe kè'w bel e pèmèt ou apresye chak pa, chak pwogrè. Ou ka poko rive manyen milyon yo, se ka poko figi'w ki parèt sou tout chèn TV, se poko cd'w oubyen video'w kap fè hit nan entènasyonal la, lè yo site non-w on kote, anpil moun ka poko janm tande'l...
Ou poko gen kay ou vle a, machin pa-w la kay konsesyonè a toujou, labank poko konsidere w kōm kliyan VIP...
Men pandan tan saa, wap viv ak on kè kontan, on kè pozé, on lo ti satisfaksyon ke anpil gwo tèt ak gwo non ta peye pou yo genyen...
Ou pa bezwen dwōg pou'w afwonte reyalite 'w, depi'w met tèt ou sou kabann, domi te gentan ap tann ou. Nenpot ti kantite manje plen vant ou, epi pa gen koze endijesyon. Ou ka deplase san kè soté, lanmō pa on fatalite pou ou paske ou konsantre enèji'w sou bon visyon e sou bay lavi.
Se sou wout siksè ke siksè komanse. Se pa lè-w rive on kote, nan on sèten nivo. Si'w pa pran tan fōje'w, apresye, édé, repoze'w, resantre 'w, viv, wap ka rive gen notoryete, repitasyon, lajan, otorite... men wap manke pi enpōtan an: lajwa otantik, lapèdespri, santiman plenitid.
Se ak tèt frèt pou'w apresye kouwōnman efō'w yo, se ak rekonesans pou'w kontinye avanse. Ou se ou. Pa mezire siksè-w nan santimèt lōt moun, nan balans sa kap mennen yo. Mennen ki bō? A ki kondisyon?
Antre nou, siksè a se pa toujou jan'w wè a... Se pi souvan jan wap viv li a... Komanse pran wout la non. Kenbe vizyon'w, kenbe zye-w ouvè, men sitou, kenbe kè'w pwop pou anyen (regrè, repōtaj...) pa gate lajwa-w lè wap jwi siksè-w.
Sister M*
Commentaires
Enregistrer un commentaire