Crédit Photo: Google |
Mwen te gen 15 lane lè mwen te bay yon gran sè m
repons sa a paske l t ap itilize m kòm yon pon poul travèse. Mwen te di l :
"ou pran m pou kèk kilòt". Mwen pa t menm di sa devan manman m, li
rapòte sa bay manman m. Lè manman m mande m kisa kilòt genyen mwen pa t
ka reponn. Konsa mwen pran anpil chaplèt pou m fè kwa pou m pa janm repete sa
ankò. Si vrèman w te leve nan men granmoun disipline, gen mo lang ou ap
anbarase lè w ap di yo.
Ayiti ap difisil pou l chanje lakoz kèk jenerasyon moun sa yo
ki voye jete tout sa moun te jije ki te bon nan tan pase yo pou chwazi vye
abitid ak betiz pou fè deba, menmsi sa yo p ap itil, sa p ap ede sosyete a nan
anyen, sinon fè l vin pi mal pase jan l ye la.
Kite m raple nou kèk prensip ki te bon, ki te itil : pa
anreta lekòl, si timoun nan pa konn leson l li p ap ka al jwe, respekte
granmoun, pa chante/sifle, pa di fout sou granmoun, pa chita kote granmoun lè l
ap pale ak lòt moun... M site sa yo sèlman.
Moral nou fin ale, men se kòmsi tout bagay te nòmal. Epoutan,
paran m, paran w, paran l, pa t viv konsa.
Sou kilès ou kapab konte jounen jodi a kòm notab, lakoz n ap viv nan yon sosyete kote tout moun pèdi kontwòl tèt yo tankou machin ki pèdi fren sou yon tèt mòn ? Betiz k ap fè deba jodi a nan Palman an, nan tout medya ak sou rezo sosyal yo ta dwe fè nou tris paske nou tout konnen sa yo vle di tout bon vre. Bagay ki ta dwe fè nou wont jouktan n kriye se yo nou bay plis valè. Kòman n t ap santi n lè timoun nou yo leve chak jou pou se vokabilè sa yo sèlman y ap repete sou pretèks se non yon atis ? Ki atis atò ? Kisa atis sa pwodui ki kapab itil sosyete a ? Ki dimansyon atis li ye ?
Gen anpil jèn timoun k ap mouri grangou ak plizyè kategori
talan nan tout kwen peyi a, li t ap bon wi si nou ta mennen yo vini nan medya yo
ak rezo sosyal yo pou n ta fè moun konnen yo, òganize pwogram ak yo yon fason
pou yo ta jwenn mwayen pou yo manje, peye lekòl, peye inivèsite, elatriye. Li
pa bon pou se chak fwa nou bezwen fè kapital nou, pou enterè imedya nou n ap
ede yon moun. Ou dwe ede moun ou pa espere anyen anyen nan men l annapre.
Si vrèman nou vle ede yon moun nou estime ki atis nan nivo sa, gen yon fason nou ka fè sa. Ba l ankandreman nan tout nivo, tankou : ba l tout sa l bezwen epi ede l fè pwofi ak talan l lan... lè sa a sosyete a t ap wè n renmen pèsonaj la toutbon.
Sispann di koulèv se pwason lè n bezwen defann koz nou. Lè konsa n p ap ede sosyete a vre...
Si vrèman nou vle ede yon moun nou estime ki atis nan nivo sa, gen yon fason nou ka fè sa. Ba l ankandreman nan tout nivo, tankou : ba l tout sa l bezwen epi ede l fè pwofi ak talan l lan... lè sa a sosyete a t ap wè n renmen pèsonaj la toutbon.
Sispann di koulèv se pwason lè n bezwen defann koz nou. Lè konsa n p ap ede sosyete a vre...
An nou produi sa k bon, sa k itil yon fason pou ti moun k ap
vini yo kapab kopye sou nou. Otorite nou yo dwe yon modèl pou jenès la, medya
yo ta dwe yon sous kote moun ap pran bonjan fòmasyon/edikasyon pou ede nan
konstriksyon sosyete a, pou sosyete a ka briye nan tout nivo. An n sispann vann
imaj k ap detri Ayiti paske Ayiti se idantite chak ayisyen k ap viv nan
mond lan. Fòk nou pwodui nan enterè youn lòt.
Commentaires
Enregistrer un commentaire