Sa t ap bèl
anpil si Rene Preval pa ta mouri tout bon vre ! Nan peyi m, Ayiti, souvan nou
rekonèt valè yon lòt twò ta. Lè yon moun vivan se pi bon moman pou n ta fè elòj
pou li, pou n montre sa li vo pou ankouraje l, fè lòt moun konnen enpòtans li,
kòman li bon pou nasyon an, sa yo t ap
fè kè l kontan pou l fè plis bagay ki
bon toujou e jwe yon wòl enpòtan k ap pèmèt li viv plis tan sou tè a.
Sou ki baz
ou montre ou sansib pou kadav mwen konsa, alòske mò pa konn anyen ? Si m te gen
pouvwa, m t ap leve pou m di sispann pale
de mwen, bann ipokrit! Nan biwo moun k
ap pale de byen de ansyen prezidan an, konbyen foto Préval w ap jwenn ? Nou
plis pran plezi nan pataje kadav li sou yon branka sou Rezo solyal yo. Mwen pa
inyore gen zanmi ki regrèt defen an tout bon, men majorite nan moun se kapital
pilitik yo y ap fè nan okazyon lanmò anyen prezidan peyi a, menm jan li konn
fèt deja pou anpil lòt sitwayen. E si otopsi a revele kè prezidan Preval bloke
aprèl fi n tande yon Prezidan parèy li monte sou yon cha kanaval joure
jounalis, grenen betiz santi tout kalte
anba zye tout kouch sosyal, otorite leta ak timoun piti ?
Pafwa menm
moun anpil moun nan sosyete a rekonèt kòm gran jounalis karyè yo pa epanye anba
gwo akizasyon, lè yo bay yon nouvèl osnon lè yo fè yon analiz ki pa an favè yon
sektè. PAske yo di sa yo konnen, jounalis sa yo te gen tan merite tout
akizasyon sou rezo sosyal, atribye yo ak tout vye bagay ki pa sanble ak yo.
Konpòtman sa pa p ede yon moun viv lontan, fòk pratik sa sispann. Diskou ak
konpòtman nou fas ak yon lòt kapab chanje lè l mouri men imaj ak aksyon yo ap
rete nan menwa fanmi an... Pafwa menm
moun ki touye w la se li ki kriye avan,
se li ki gen pi bon temwanyaj sou kadav ou. Èske temwanyaj n ap tande jounen
jodi a nan medya yo, ki soti bò kote moun nan pouvwa a ak diferan sektè nan
opozisyon an jounen jodi a revele vrè
karaktè René Préval? Fè yon ti egzèsis. Mete nan tèt nou Préval pa
mouri, nou nan peryòd eleksyon. Préval poze kandida li, èske politisyen ak
òganizasyon yo t ap gen menm konpòtman pou ta afiche yo pou di Préval se te yon
nonm de byen pou di tout sa li te fè ki bon? Mwen garanti w chans la vrèman
piti. Pou konbat advèsè a, se vye dosye yo rale, akizasyon tout kalte, vye tit nou konnen yo
konn itilize pou detwi m, detwiw, detwi lòt yo jis pou fè tèt yo pase pou pi
bon, pou fè wè l pa merite pòs la.
Si lè m vivan
ou te akize m kòm dilè dwòg, volè, kidnapè, kadejakè, machann mikwo olye w te
felisite m, mwen pa wè sou ki baz lè m mouri se yon lòt temwanyaj k ap sikile
pou fè kwè m te yon nèg serye . Tout sa w tande a pa gen twò lontan yon sektè
politik te trè amè kont ansyen prezidan René Préval. Yo te menm ap mande pou
mete l nan prizon. Jounen jodi a Prezidan Préval mouri diskou yo chanje, pouki
rezon?
Jodi a mwen
swete nou kòmanse aprann apresye valè youn lòt, ankouraje youn lòt nan aksyon
pozitiv yo. Pa tann lè moun nan pa egziste ankò pou fè l. Lè sa a li pa p itil
ni abouti ak anyen. Si m ta mouri aprè m fi n ekri tèks sa a, dènye moun mwen
te pale nan telefòn se te Fanel Delva. Mwen toujou ankouraje l chak fwa li
reyalize yon bon bagay. Se pa nan lide pou m flate l, pou m jwenn yon bagay an
retou, men se pito poum montre l li gen valè nan zye m e ankouraje l pwodwi
plis.
Commentaires
Enregistrer un commentaire